काठमाडौं । अमेरिकी पूर्वराष्ट्रपति डोनाल्ड ट्रम्पले चिनियाँ कम्पनी बाइटडान्सको स्वामित्वमा रहेको छोटो भिडियो सेयरिङ एप टिकटकको बिक्री सुनिश्चित गर्न चीनलाई नयाँ प्रस्ताव अघि सारेका छन्। उनले टिकटक बेच्ने सम्झौतामा सहजीकरण गर्न चीनमा लगाइएको कर घटाउन सक्ने संकेत गरेका छन्।

ट्रम्पले टिकटकका लागि गैरचिनियाँ खरिददार खोज्न आवश्यक समयसीमा बढाउन पनि तयार रहेको बताएका छन्। उनका अनुसार, अप्रिल ५ सम्म यस विषयमा समाधान निकाल्न प्रयास हुनेछ।

यसअघि, जो बाइडेन प्रशासनले अमेरिकी राष्ट्रिय सुरक्षामा असर पार्न सक्ने भन्दै टिकटकमाथि प्रतिबन्ध लगाउने कानुन पारित गरेको थियो। तर, जनवरीमा सत्ता सम्हालेपछि ट्रम्पले सो कानुनको कार्यान्वयनमा ढिलाइ गरेका थिए। अमेरिकाले टिकटकलाई राष्ट्रिय सुरक्षाका लागि खतरा ठानेर २०२४ मै यससम्बन्धी कानुनी प्रक्रिया अघि बढाएको थियो।

ट्रम्पले हालै पत्रकारहरूसँग कुराकानी गर्दै भने, "टिकटकको विषय टुंग्याउन चीनले भूमिका खेल्नुपर्छ। मलाई लाग्छ, उनीहरूले भूमिका खेल्नेछन्। यसका लागि म करमा थोरै कटौती गर्न सक्छु।"

उनको विश्वास छ कि अप्रिल ५ को समयसीमाभित्र सम्झौताको रूपरेखा तय गरिनेछ। टिकटकको भविष्य के हुन्छ भन्ने विषयमा अमेरिकी प्रशासन र चीनबीचको छलफल निर्णायक मोडमा पुगेको देखिन्छ।